Վարորդը կամ քնած է եղել, կամ ինֆարկտ ստացել, փրկվածներից մեկն է օգնություն կանչել․ նոր մանրամասներ

Սյունիքի մարզի Գորայք բնակավայրի վարչական ղեկավար Կարեն Պետրոսյանը «Հայկական ժամանակ»-ի հետ զրույցում զորացրված զինծառայողներին տեղափոխող մեքենայի վթարի հետ կապված որոշ մանրամասներ է հայտնել:

«Կա՛մ վարորդը քնած է եղել, կա՛մ ինֆարկտ է ստացել, կա՛մ էլ շատ արագ է եղել, բայց եթե դիտարկում ենք նաև այն վարկածը, թե կարող է հանդիպակաց մեքենա է դուրս եկել դիմացը, փորձել է շրջանցել, բայց արգելակման հետքեր չկան։ Այլ վարկած չկա»,- ասում է նա։

Նրա խոսքով՝ ճանապարհը ուղիղ է եղել․ «Ո՛չ քանդված է, ո՛չ էլ ջուր կար, որ, ասենք, կարող է մեքենան սահել է»:

Ըստ Պետրոսյանի՝ բոլոր զինծառայողները զորացրվել են Մեղրի համայնքից և տաքսիով տուն վերադառնալիս են եղել։

Վթարի հետևանքով 6 զինծառայողներից միայն մեկի վիճակն է բավարար եղել, որն էլ կարողացել է իջնել մեքենայից, ձորից դուրս գալ ու առաջին օգնություն կանչել՝ կանգնեցնելով մեքենաներին։