Սևանն այս տարի էլ կկանաչի
Սևանն այս տարի էլ կկանաչի
Քանի որ այս պահին մեր ջրային ռեսուրսների վիճակը լավ չէ, մենք հիմա պարտավորված ենք Սևանից ջուր բաց թողնենք ոռոգման համար: Այս մասին ԱԺ-ում քննարկման ժամանակ հայտարարեց շրջակա միջավայրի նախարար Հակոբ Սիմիդյանը:
Նա հայտնեց, որ խնդիրը լիարժեք կանոնակարգված չէ և Հայաստանը չունի սակավաջուր տարիներին վերաբերող հաստատված ընթացակարգ, ինչի ուղղությամբ աշխատում են ՇՄ և ՏԿԵ նախարարությունները:
Սիմիդյանը հայտնեց, որ բոլորի խնդիրն է համատեղ գործողություններ և ջանքեր ներդնել, որպեսզի Սևանա լճի վրա գործադրվող ճնշումը թուլանա:
«Այս տարի այդ իմաստով լավ տարի մեզ չի սպասվում և, ցավոք, Սևանն այս տարի էլ երևի կկանաչի և դժվարություններ կունենանք»,-ասաց ՇՄ նախարարը:
Նախարարը հայտնեց, որ Սևանի վրա ճնշումը մեծ է, 5 խոշոր բնակավայրի կոյուղաջրերը թափվում են լիճ և միջազգային գործընկերների հետ աշխատանքներ են տարվում կոյուղաջրերի կենսաբանական մաքրման կայաններ կառուցելու նպատակով:
«Պետք է գյուղացիների հետ էլ աշխատենք, գյուղատնտեսական այլ ուղղություններ զարգացնեն և, օրինակ, անասնապահությունը, որը կարող է ճնշում ունենա Սևանա լճի վրա, փոխարինենք այլ գործիքակազմով»,-ասաց Սիմիդյանը:
