Ոչ սթափ վիճակում 62 վարորդ. Ճանապարհային ոստիկաններն ուժեղացված ծառայություն են իրականացրել
Ոչ սթափ վիճակում 62 վարորդ. Ճանապարհային ոստիկաններն ուժեղացված ծառայություն են իրականացրել
Ճանապարհային ոստիկանության 1-ին սպայական գումարտակի ծառայողները փետրվարի 3-ից 9-ն ուժեղացված ծառայություն են իրականացրել մայրաքաղաքում:
Արդյունքում պահպանվող հատուկ տարածք են տեղափոխել 214 մեքենա, որոնցից 20-ի վարորդները եղել են ոչ սթափ վիճակում:
ՀՀ ոստիկանությունը տեղեկացնում է, որ մյուսների վարորդները չեն ունեցել համապատասխան փաստաթղթեր կամ թույլ են տվել ճանապարհային երթևեկության կանոնների կոպիտ խախտումներ՝ վտանգելով երթևեկության այլ մասնակիցների կյանքն ու առողջությունը։
Նույն ժամանակահատվածում մարզերում ուժեղացված ծառայություն են իրականացրել ճանապարհային ոստիկանության երկրորդ սպայական գումարտակի ծառայողները, որոնք պահպանվող հատուկ տարածք են տեղափոխել 52 մեքենա։ 42-ի վարորդները եղել են ոչ սթափ վիճակում։
Բացի այդ հայտնաբերվել է առանց համարանիշերի շահագործվող 2, առանց ԱՊՊԱ պայմանագրի՝ 26, թաղանթապատված դիմապակիով` 79 տրանսպորտային միջոց։
«Ի դեպ, փետրվարի 8-ին հանրապետության գրեթե ողջ տարածքում տեղաց առատ ձյուն: Դրա կապակցությամբ ճանապարհային ոստիկանությունն արտակարգ ռեժիմով իրականացրեց ուժեղացված հատուկ ծառայություն և՛ մայրաքաղաքում, և՛ մարզերում:
Ծառայության են դուրս եկել ճանապարհային ոստիկանության 380 ծառայողներ:
Նրանք ոչ միայն ապահովել են անվտանգ երթևեկություն, այլև համագործակցելով մյուս գերատեսչությունների աշխատակիցների հետ, օգնել են ձնաբքի մեջ հայտնված վարորդներին:
