Ողբերգական դեպք Շիրակի մարզում․ սեփական տան բակում հայտնաբերվել են երիտասարդ ամուսինների դիերը
Ողբերգական դեպք Շիրակի մարզում․ սեփական տան բակում հայտնաբերվել են երիտասարդ ամուսինների դիերը
Shamshyan.com-ի փոխանցմամբ՝ այսօր, օգոստոսի 7-ին, ողբերգական դեպք է տեղի ունեցել Շիրակի մարզում։
Ժամը 15։40-ի սահմաններում Գյումրի քաղաքի ոստիկանության Կումայրիի բաժին ահազանգ է ստացվել, որ Ալավերդյան 70 տան բակում պայթյունի ձայն է լսվել և կան տեղեկություններ, որ տուժած քաղաքացիներ կան։
Ինչպես հայտնում է ֆոտոլրագրող Գագիկ Շամշյանը, օպերատիվորեն ժամանել են ոստիկանության Շիրակի մարզային վարչության պետի տեղակալներ Վահրամ Ենգոյանն ու Վաչիկ Ղարիբյանը։
Ժամանել են նաև ոստիկանության Կումայրիի բաժնի օպերատիվ խումբը՝ բաժնի պետ Արամ Ղարիբյանի գլխավորությամբ։ Ոստիկանները տան բակում հայտնաբերել են նույն տան բնակիչներ 35-ամյա Գևորգ Գասպարյանի և 30-ամյա Լիանա Գասպարյանի դիերը։ Հայտնաբերվել են նաև պայթյունի հետքեր։
Այս պահին ոստիկանները դեպքի վայրը սահմանազատել են, իսկ տեղում աշխատում են ոստիկանության Շիրակի մարզային վարչության փորձաքրեագետները։
Գ․ Շամշյանի տեղեկություններով՝ մահացածներն ամուսիններ են։ Ամուսինը զինվորական է։ Եվ այս պահին քննարկվում է, թե դեպքով ո՞ր գերատեսչությունն է զբաղվելու, Հայաստանի քննչական կոմիտեի Շիրակի մարզային քննչական վարչությո՞ւնը, թե՞ ՀՀ ՊՆ ռազմական ոստիկանությունը։ Պարզվում է նաև, թե ինչ հանգամանքներում է տեղի ունեցել պայթյունը։
