Ո՞վ էր «Լոշտ» Էդոն և ինչ էր պահանջում․ «Հրապարակ»
Ո՞վ էր «Լոշտ» Էդոն և ինչ էր պահանջում
«Հրապարակ» թերթը գրում է. Ուրբաթ օրը նռնակով Մասիսի համայնքապետարան ներխուժած, ապա, ըստ ոստիկանության, ինքնասպանություն գործած Էդուարդ Մարգարյանը, ըստ Մասիսում շրջանառվող լուրերի, եղել է համայնքապետ Դավիթ Համբարձումյանի երբեմնի դաշնակիցը՝ Մասիսի ավագանու անդամ էր 2016-2021 թթ․:
Ավելին, պատմեցին, որ քաղաքապետի եղբայրը` Գոռ Համբարձումյանը, Է․ Մարգարյանի՝ Լոշտ Էդոյի միջոցով բազում «գործեր» է արել, եւ արդյունքում փողի պարտք-պահանջի խնդիր է առաջացել նրանց միջեւ։
![edo gor](https://bavnews.am/wp-content/uploads/2022/08/edo-gor.jpg)
Նա տեւական ժամանակ քաղաքապետի հետ հանդիպում է պահանջել, փորձել է նրանից ստանալ իր «ստանալիքը» եւ, ըստ մեր աղբյուրի, դեպքի օրն էլ ժամադրություն է փորձել պլանավորել, բայց Դավիթ Համբարձումյանը մերժել է, որից հետո Էդոն վերցրել է զենք-զինամթերքն ու գնացել քաղաքապետարան։
Պատմում են՝ վերջին շրջանում նա որոշ տարօրինակություն էր դրսեւորել, թերեւս պայմանավորված խմիչքի չարաշահմամբ։ Ի դեպ, չնայած դեպքը տեղի է ունեցել ուրբաթ օրը, բայց մինչեւ երեկ դեռ դին դիահերձարանից տուն չէին տարել, քանի որ հարազատները պահանջել են, որ դատաբժշկական եզրակացության մեջ հանգուցյալի մարմնի վրա առկա բոլոր վնասվածքները նշվեն։
Ասում են` ամիսներ առաջ նրա ուսին են կրակել, հետո գործը ծածկադմփոց արել, եւ հայրը պահանջում է, որ դա ֆիքսեն։ Դեպքից րոպեներ հետո Դավիթ Համբարձումյանը գրառում արեց.
![eduard margaryan nkar](https://bavnews.am/wp-content/uploads/2022/08/eduard-margaryan-nkar.jpg)
«Տեղեկանալով մեր համայնքապետարանում տեղի ունեցող միջադեպի մասին, շտապ վերադարձել եմ արձակուրդից եւ այժմ աշխատանքային գործընթացի մեջ եմ»:
Մասիսում կարծում են, որ այս պատմությունը շարունակություն է ունենալու` հանգուցյալի ավագ եղբայրը բավականին տաքարյուն երիտասարդ է, եւ հայտնի չէ, թե ինչպես կպահի իրեն եղբոր մահից հետո։
Մանրամասները` թերթի այսօրվա համարում