Միջազգային օրենքներով արգելվում է խցում գաղտնալսելը, սրանք արել են՝ կցել գործին․ «Հրապարակ»
«Հրապարակ»-ը գրում է․ «Իրավապահները չեն դադարում ստրուկի պես ծառայել իշխանությանը եւ որոշել են մինչեւ վերջ խայտառակվել։ Օրեր առաջ բացահայտվեց, որ Բագրատ սրբազանի եւ մյուսների գործով գաղտնալսումների ձայնագրություններն են մոնտաժվել, խեղաթյուրվել, օրերս էլ տեղեկացանք, որ «Երեւան-Կենտրոն» ՔԿՀ-ում՝ ԱԱԾ մեկուսարանում, Բագրատ եւ Միքայել սրբազաններին նույն խցում են պահել եւ գաղտնալսել։ Այնուհետեւ խցում արված ձայնագրությունները կցել են Բագրատ սրբազանի եւ մյուսների գործի նյութերին եւ ուղարկել դատարան։ Գաղտնալսումը թույլատրելի է միայն դատարանի որոշմամբ։ Սա միանգամայն նոր պրակտիկա է, երբ հատուկ պայմաններ են ստեղծվում, քաղաքական բանտարկյալներին իրար հետ են նստեցնում, որ գաղտնալսեն եւ նոր ապացույցներ ձեռք բերեն, իրենց անհիմն մեղադրանքը կարողանան ապացուցել: Սա այն նույն շարքից է, երբ Միքայել Աջապահյանի գործում, որպես ամենալուրջ ապացույց, ներկայացված է նրա օրագիրը: Խցում արված ձայնագրությունները, ըստ փաստաբանների, որեւէ առնչություն չունեն Բագրատ սրբազանի գործի հետ, սակայն կցվել են գործի նյութերին ու ներկայացվել դատարան։
Բագրատ սրբազանի պաշտպան Հովհաննես Խուդոյանը «Հրապարակ»-ի հետ զրույցում ասաց, որ դատարանը թույլ է տվել գաղտնալսել, սակայն պաշտպանական թիմը բողոքարկել է այդ որոշումը, քանի որ դա բացարձակ ապօրինություն է։ «Գաղտնալսման նյութերի բովանդակությունը գործի համար բացարձակ նշանակություն չունի։ Քաղաքական նշանակության, հետաքրքրության տարբեր հարցեր են քննարկում, բայց ոչ Բագրատ սրբազանի գործի վերաբերյալ։ Ապօրինի է սրբազանների գաղտնալսումը եւ անհասկանալի է Բագրատ սրբազանի եւ մյուսների գործին կցելը»,- ասաց նա։
Բագրատ սրբազանի գործով անցնող Աղվան Արշակյանի փաստաբան Վարազդատ Հարությունյանն էլ մեզ ասաց՝ ծանոթացել է գաղտնալսման նյութերին, որեւէ առնչություն չունեն գործի հետ։ «Դիտավորյալ են երկուսին նույն խցում տեղավորել, որպեսզի գաղտնալսեն։ Գործին վերաբերող ոչ մի էական բան չկա։ Միջազգային տարբեր օրենքներով արգելվում է խցում գաղտնալսում անելը, խցակիցների զրույցները լսելը, սակայն սա միակ կարմիր գիծը չէ, որ քրեական հետապնդում իրականացնող մարմիններն անցել են։ Դատավարությունն առջեւում է, անդրադառնալու ենք նաեւ այդ գաղտնալսումներին, դրանց իրավաչափությանը»,- ասաց նա։
Վերջին դատական նիստում Բագրատ սրբազանն ինքն էլ անդրադարձել էր այս հանգամանքին․ «Էնքան էս գործի տակ ոչինչ չկա խեղճերին, որ ձայնագրել են իմ եւ Միքայել սրբազանի խոսակցությունը երկու եղբոր խոսակցությունը, գուցեեւ անձնական կյանքի խոստովանություն, եւ բերել կցել են մեր գործերին։ Այ, սա է ձեր որակը, ես խղճում եմ, մեղք է մեր պետությունը, մեղք են մեր կյանքն ու էսքան ժողովուրդը, որ հանձնվել են ձեզ։ Այդ աստիճանի նենգ եք»։ Ի դեպ, մեզ պատմեցին, որ գաղտնալսման նյութերում մի ուշագրավ երկխոսություն կա երբ Բագրատ սրբազանը հարցնում է Միքայել սրբազանին, թե ինչու հրաժարվեց ընդդիմության վարչապետի թեկնածությունից, Միքայել արքեպիսկոպոսն ասում է, որ փաստաբան Արա Զոհրաբյանն ասաց, որ եթե հրաժարվես, հնարավոր կլինի խուսափել կալանքից: Եվ պարզ չէ, թե այս երկխոսությունն ինչ կապ ունի առաջադրված մեղադրանքի հետ:
Իրականում Բագրատ եւ Միքայել սրբազանների գաղտնալսված զրույցները եւս վկայում են, որ նրանց մեղսագրված ամենածանր մեղադրանքները՝ իշխանություն զավթելու փորձ, ահաբեկչական գործողությունների նախապատրաստում, որեւէ փաստական հիմք չունեն։ Ակնհայտ է, որ այս գործը վաղուց դուրս է եկել իրավական դաշտից եւ վերածվել քաղաքական հաշվեհարդարի միջոցի»։
