Մահացել է լեգենդար հետախույզ Գոհար Վարդանյանը
Մահացել է լեգենդար հետախույզ Գոհար Լեւոնի Վարդանյանը: Այս մասին ֆեյսբուքում գրել է գրող, հրապարակախոս Գուրգեն Խաժակյանը:
Գոհար Վարդանյանը ծնվել է 1926 թվականի հունվարի 25-ին Գյումրիում: 1930-ականների սկզբին ընտանիքի հետ տեղափոխվել է Իրան:
16 տարեկանում նա մտել է իր ապագա ամուսնու՝ Գեւորգ Վարդանյանի հակաֆաշիստական խումբը, որի հետ Իրանում ակտիվ հետախուզական աշխատանք է կատարել բարդ պայմաններում: 1943 թվականին այդ խմբի կազմում մասնակցել է Թեհրանի կոնֆերանսի անվտանգության ապահովման օպերացիայի անցկացմանը:
1951 թվականին Վարդանյան ամուսինները վերադարձել են ԽՍՀՄ, 1956 թվականին հաջողությամբ ավարտել են Երեւանի օտար լեզուների ինստիտուտը, որից հետո Գոհար եւ Գեւորգ Վարդանյանները սկսել աշխարհի տարբեր երկրներում էքստերմալ պայմաններում հետախուզական աշխատանքը:
1986 թվականին 30 տարվա բեղմնավոր աշխատանքից հետո Գոհար եւ Գեւորգ Վարդանյանները վերադարձել են հայրենիք:
Գոհար Վարդանյանը պարգեւատրվել է Կարմիր դրոշի, Հայրենական պատերազմի II աստիճանի շքանշաններով եւ այլ մեդալներով: 1986 թվականի դեկտեմբերին նա թոշակի է անցել՝ ունենալով ավելի քան 30 տարվա օպերատիվ աշխատանքի եւ ընդհանուր առմամբ ավելի քան 47 տարվա աշխատանքային ստաժ:
