Մահացել են Իրանի գերագույն առաջնորդի հարսը և փեսան
Իրանի գերագույն առաջնորդ Ալի Խամենեիի փեսան և հարսը զոհվել են ԱՄՆ-ի և Իսրայելի ավիահարվածների հետևանքով, հաղորդում է «Ջամարան» լրատվական գործակալությունը՝ հղում անելով Թեհրանի քաղաքային խորհրդի անդամ Մեյսամ Մոզաֆարին։
«Նյու Յորք Թայմս»-ը փետրվարի 28-ի կեսօրին հրապարակել է արբանյակային լուսանկարներ, որոնք ցույց են տալիս Խամենեիի նստավայրի լիակատար ավերված լինելը։ Արտաքին գործերի նախարար Աբբաս Արաղչին հերքել է առաջնորդի մահվան լուրը։ «Բոլոր բարձրաստիճան պաշտոնյաները ողջ են», – ասել է նա։
«Ալ Մայադին» հեռուստաընկերության աղբյուրները նույնպես հաղորդում են, որ Խամենեին ողջ է և ղեկավարում է ռազմական գործողություններն աշխատանքային խմբից։
«Ռոյթերս»-ը հաղորդել է Իրանի պաշտպանության նախարար Ազիզ Նասիրզադեի և Իսլամական հեղափոխության պահապանների կորպուսի (ԻՀՊԿ) հրամանատարի մահվան մասին։
Արաղչին հայտնել է, որ սպանվել են երկու ռազմական առաջնորդներ, սակայն չի նշել նրանց անունները կամ պաշտոնները։ Կարմիր մահիկի տվյալներով՝ Իրանի վրա հարձակումների հետևանքով զոհվել է ավելի քան 200 մարդ։
