Հոկտեմբերի 12-ից փոխվում է ԵՄ մուտքի կանոնները․ ի՞նչ պետք է իմանալ

Հոկտեմբերի 12-ից Եվրամիության երկրներ մտնելու կարգը փոխվում է` սահմանին կնիքի փոխարեն կլինի կենսաչափական նույնականացում։ Տեղեկությունը հայտնում է ՀՀ արտաքին գործերի նախարարությունը։

«Նոր համակարգը վերաբերում է բոլոր այն քաղաքացիներին, որոնք չեն հանդիսանում ԵՄ կամ Շենգենյան գոտու անդամ պետության քաղաքացի, այդ թվում՝ ՀՀ քաղաքացիներին։ Սահմանային անցակետերում ԵՄ և Շենգենյան գոտու պետությունները կգրանցեն յուրաքանչյուր մուտք և ելք՝ փոխարինելով ներկայիս անձնագրում դրոշմակնիքների դնելու գործելակերպը»,- ասված է հայտարարությունում։

Գրանցվող տվյալները.

Անձնական տվյալներ (անուն, ազգանուն, քաղաքացիություն և այլն),

Ճամփորդական փաստաթղթի տվյալներ,

Մուտքի և ելքի ամսաթիվ ու վայր,

Կենսաչափական տվյալներ՝ մատնահետք և դեմքի լուսանկարում։

Նոր կարգի սահմանման նպատակը, ըստ ԱԳՆ-ի, Շենգենյան գոտու արտաքին սահմանների վերահսկողությունն ամրապնդելն ու անվտանգությունը բարձրացնելն է։

«Համակարգն ավտոմատ կերպով կվերահսկի, թե արդյոք թույլատրելի է տվյալ անձի մուտքը, արդյոք չի գերազանցվել Շենգենյան գոտում կարճաժամկետ մնալու «90 օր յուրաքանչյուր 180 օր ժամանակահատվածում» կանոնը»,- հայտնում է արտգործնախարարությունը։

Նշվում է, որ համակարգը կգործի բոլոր արտաքին սահմանային անցակետերում՝ օդանավակայաններում, ծովային նավահանգիստներում և ցամաքային սահմանային անցակետերում։ Գերատեսչությունը զգուշացրել է, որ սահմանի ստուգումն ավելի երկար կարող է տևել։