ՀՀ քաղաքացին բարձրանալով Արարատ լեռը հայտնվել է դիաբետիկ կոմայի մեջ. նրան բերել են Հայաստան
ՀՀ քաղաքացին բարձրանալով Արարատ լեռը հայտնվել է դիաբետիկ կոմայի մեջ. նրան բերել են Հայաստան
Գոռ Ծառուկյանը ֆեյսբուքյան իր էջում տեղեկություն է հայտնել․
«Մեր գործընկեր Գևորգ Կալլոշյանի սրտացավ աշխատանքի և Արտաքին գործերի նախարարության օպերատիվության շնորհիվ հնարավոր եղավ գրեթե մեկ օրում կազմակերպել Թուրքիայից օդային ճանապարհով ՀՀ քաղաքացու տեղափոխումը Հայաստան։
Արարատ լեռը բարձրանալուց և իջնելուց հետո քաղաքացու առողջական վիճակը կտրուկ վատացել էր և հայտնվել էր դիաբետիկ կոմայի մեջ։
Դողուբայազեթի հիվանդանոցում թուրք բժիշկներին հաջողվել էր փոքր-ինչ կայունացնել կնոջ վիճակը։ Բժիշկները պնդել էին, որ Հայաստան տեղափոխումը պետք է իրականացվի միայն օդային ճանապարհով։ Ահա այստեղ էլ օգնության հասավ հայկական սանիտարական ուղղաթիռը, և կառավարությունն անվճար կազմակերպեց քաղաքացու տեղափոխումը Հայաստան»,- գրել է նա։
Վերջինս նկատել է, որ թուրքական կողմը ևս օպերատիվ արձագանքել է և որևէ խնդիր չի առաջացրել օդային միջանցք տրամադրելու հարցում։
Ավելի վաղ հայտնել էինք, որ հայկական և թուրքական կողմերի համագործակցությամբ Թուրքիայում ինքնազգացողությունը վատացած ՀՀ քաղաքացուն օդային ճանապարհով տեղափոխել են Հայաստան:
Թուրքիայի ԱԳՆ-ն օպերատիվ կերպով արձագանքել է, բժիշկները տեղում ցուցաբերել են առաջին և անհետաձգելի բուժօգնություն, այնուհետև՝ կազմակերպել փաստաթղթերի հետ կապված հարցերը:
Պացիենտին բուժհաստատությունից արգելվել է տեղափոխել ցամաքային ճանապարհով:
Քաղաքացու վիճակը կայուն ծանր է:
