ՀՀԿ-ն ոչ մի շանս չունի. Թաղային խուժանի դեմ ես եմ դուրս գալու պայքարեմ. Աշոտ Աղաբաբյան
ՀՀԿ-ն ոչ մի շանս չունի. Թաղային խուժանի դեմ ես եմ դուրս գալու պայքարեմ. Աշոտ Աղաբաբյան
«Առաջին լրատվական»-ի զրուցակիցն է ՀՀԿ-ական նախկին պատգամավոր, ՀՀԿ ԳՄ նախկին անդամ, գործարար Աշոտ Աղաբաբյանը։
–Պարոն Աղաբաբյան, ՀՀԿ-ն որոշում կայացրեց Արթուր Վանեցյանի «Հայրենիք» կուսակցության հետ համատեղ մասնակցել առաջիկա ընտրություններին, թեև ավելի վաղ մերժում էին գործող իշխանութան կողմից կազմակերպվելիք ընտրությունների գաղափարը։ Ձեր կարծիքով ի՞նչը ստիպեց ՀՀԿ-ին մասնակցել ընտրություններին և ի՞նչ շանս ունի ՀՀԿ-ն։
-Նախ ասեմ, որ առաջին անգամ չէ, որ ՀՀԿ-ն գլուխ է գովում, կամ սուտ է խոսում։ Ինչ վերաբերում է շանսերին, ապա գտնում եմ, որ շանսեր բացարձակ չունեն։ Անհնար բան է, որ նրանք օրինական ճանապարհով ձայն հավաքեն։ Այն ժամանակ համամասնական, մեծամասնական ընտրակարգեր կային, բայց հիմա բացառված է, որ նախկինում իրենց ձայն տվողները հիմա նորից ձայն տան։
Նախկինում մեծամասնականով ՀՀԿ-ի համար ձայն բերողները մենք ենք եղել, մինչև 25-30 հազար ձայն ենք բերել։ Հիմա մենք չկանք այդտեղ, նրանց համար ո՞վ է ձայն բերելու։ Եվ հետո, վերջին փորձությունը իրենք շատ վատ անցան, այնքան դավաճանություն արեցին, որ այդքանից հետո եթե ժողովուրդը նրանց ձայն տա, ապա մենք ժողովուրդ չունենք։
–Ստացվում է, որ ընտրություններին մրցակցությունը ընթանալու է իշխանության, Քոչարյանի ու այս նորաստեղծ դաշինքի մի՞ջև։ Այս պարագայում ի՞նչ դերակատարություն կարող են ունենալ նոր ուժերը։
-Ամեն մարդ էլ իրավունք ունի մասնակցելու ընտրություններին։ Եթե օրենքը չի խանգարում, ապա ցանկացած ուժ էլ կարող է և պետք է մասնակցի ընտրություններին։ Իսկ թե ինչպիսի մրցակցություն կլինի, չեմ կարող ասել։
–Պարոն Աշոտ Աղաբաբյան, ստացվում է, որ այս արտահերթ ընտրություններին մասնակցում են նախկինում ընտրություններ կեղծելու, ընտրակաշառք բաժանելու մեծ փորձ ունեցող երկու ուժ։ Նախկին մեթոդներն այս ընտրություններին կարո՞ղ են կիրառվել և արդյունք տալ։
-Ես նորից եմ կրկնում, նրանք շանսեր չունեն։ Իրենք ընտրակեղծիքներ չեն կարող թույլ տալ։ Եթե նրանք ընտրվեն, ապա այս իշխանությունը թասիբ, նամուս չունի։
–Ինչո՞ւ եք այդքան վստահ, որ ընտրակեղծիքներ չեն լինելու։
– Նախ իշխանությունը թույլ չի տա, և հետո ժողովուրդը դա թույլ չի տա, չի գնա դրան։ Իսկ եթե գնա դրան ու նրանք ձայն հավաքեցին, ուրեմն մենք ժողովուրդ չունենք։ Ուղղակի ամոթ է, որ նման բան լինի։
–Մամուլում արդեն լուրեր են շրջանառվում, որ Քոչարյանը մեկ ձայնի համար 50 հազար դրամ է խոստանում։
-Թեև Քոչարյանը այդ հնարավորությունը ունի, 100 հազար էլ կարող է տալ, բայց չեմ կարծում, որ դրանով կարող են գայթակղվել։ Եթե ընտրողը կարող է 50 հազար դրամով գայթակղվել ու դրանով վտանգեն իրենց ապագան, վաճառեն իրենց ապագան, ապա բան չեմ կարող ասել։
–ՀՀԿ-ի՝ Վանեցյանի հետ համատեղ մասնակցությունը ընտրություններին հեշտացնո՞ւմ է իշխանության գործը։
-Նախ ես կարծում եմ, որ ընտրությունները կարող է և չլինեն։ Մարդը լեգիտիմ ընտրված վարչապետ է։ Ընտրություններ պետք է որ չլինի, եթե իհարկե, հարցը Մոսկվայի հետ չի կապված։ Եթե անգամ ընտրություններ էլ լինեն, Նիկոլ Փաշինյանը նորից ընտրվելու է և դրանով ապացուցելու է, որ նախկինները չկան ու նրանց հետ գալը բացառված է։
–Նախորդ բոլորը ընտրություններին մշտապես իշխանության համար աշխատած թաղային խուժանը, քրեական տարրերը կարո՞ղ են դերակատարություն ունենալ այս ընտրություններին։
-Թաղային խուժանի դեմ ես եմ դուրս գալու և պայքարեմ, եթե նման բան լինի։ Սատկացնելով կգնամ։ Եվ հետո էլ հանձնաժողովները իրենցը չի, որ հանձնաժողովների միջոցով ինչ ուզենան անեն։ Իրենց կողմից ինչ-որ քայլեր կարվեն, բայց իշխանությունները դա պետք է թույլ չտան։ Ժողովուրդը դա պետք է թույլ չտա։
Առավել մանրամասն՝ սկզբնաղբյուր կայքում
