Կարող ես լինել 1.5 տարվա վարչապետ, բայց լինել քաղաքական զրո․ Շարմազանով (Տեսանյութ)
Կարող ես լինել 1.5 տարվա վարչապետ, բայց լինել քաղաքական զրո․ Շարմազանով
168TV-ի «Ռեվյու» հաղորդման շրջանակում զրուցել ենք Հայաստանի հանրապետական կուսակցության գերագույն մարմնի անդամ Էդուարդ Շարմազանովի հետ
– Պարոն Շարմազանով, ապրիլի 5-ին կայանալիք հանրաքվեի վերաբերյալ Ձեր ֆեյսբուքյան էջում գրել եք․ «Այո ասելով հանրաքվեին՝ այո եք ասելու Ստամբուլյան կոնվենցիայի վավերացմանը, տրանսգենդերության քարոզին, բացարձակ բռնապետության հաստատմանը։ Սա Փաշինյանի հերթական կեղծ օրակարգն է»: Ինչո՞վ է պայմանավորված Ձեր այս համոզմունքը:
– Համոզմունքս պայմանավորված է և հիմնված է փաստերի վրա, շուրջ երկու տարվա ապաշնորհ կառավարման և հակապետական գործողության վրա, որն իրականացվում է Փաշինյանի նեոբոլշևիկյան ռեժիմի կողմից:
Փաշինյանը եկել է իշխանության շանտաժով, հայտարարելով, որ կամ ինքը կլինի վարչապետ, կամ Հայաստանը վարչապետ չի ունենա, այնուհետև Փաշինյանը 2018թ. օգոստոսի 17-ին խոսել է բռնապետական բառապաշարով, ԱԱԾ-ով վախեցնելով, ասֆալտին փռելով, սև ու սպիտակի բաժանելով:
Հոկտեմբերի 2-ին արշավել է ԱԺ վրա, կոպտորեն խախտելով իշխանությունների տարանջատման սկզբունքը: Դեկտեմբերի 9-ի ընտրություններին իրականացրել է ատելության քարոզ: Այդ ամբողջ ընթացքում իրականացրել է քաղաքական ձերբակալություններ ու քաղաքական բռնաճնշումներ:
Արդեն նախորդ տարվա մայիսի 19-ին Փաշինյանն աննախադեպ գործողություն իրականացրեց՝ անձամբ մասնակցեց դատարանների շրջափակմանը, որը քրեորեն պատժելի արարք է:
Այնուհետև նա փորձեց կաշառել ՍԴ դատավորներին՝ «Իմ քայլը» խմբակցությունն ընդունեց դատավորներին կաշառելու մասին օրենք, դա էլ չստացվեց: Այդ ամբողջ ընթացքը համեմվեց պղծության և համասեռամոլության քարոզով:
Մենք տեսանք, որ ԱԺ ամբիոնը Փաշինյանի իշխանության շրջանում վերածվեց տրանսգենդերության քարոզի, և հենց այդ տրանսգենդերը, որը ելույթ ունեցավ ԱԺ ամբիոնից, ինքն է ասել, որ նախորդ իշխանության օրոք անհնար էր նման բան, որ տրանսգենդերության քարոզ տեղի ունենար ԱԺ ամբիոնից, և նշեց, որ սա իրենց հեղափոխության հաղթանակներից մեկն է:
Հետևաբար, ես հայտարարում եմ, որ ով «այո» է ասում այս հանրաքվեին, «այո» է ասում Ստամբուլյան կոնվենցիայի վավերացմանը, տրանսգենդերության քարոզին, հակապետական և ապազգային քարոզին:
– Նիկոլ Փաշինյանն էլ ասում է, որ «այո» ասելով՝ մերժում են կոռուպցիոներներին:
– Գիտե՞ք ինչ կա՝ Նիկոլ Փաշինյանը կարող է շատ բան ասել, բայց նա էլ ասելու տեղ չունի, որովհետև հեղափոխությունից առաջ ասում էր՝ կարմիր գծերը պետք է մերժենք, տեսախցիկները պետք է մերժենք, կուտակային կենսաթոշակները պետք է մերժենք, հիմա հերթով՝ 2 տարի անցել է՝ կարմիր գծերը կան, տեսախցիկներն ավելացել են, կուտակային կենսաթոշակները խելոք մուծում են:
Ասում էր՝ իշխանությունները պետական բյուջեն անարդյունավետ են ծախսում, Նիկոլ Փաշինյանի իշխանությունը 350 հազար դոլար տրամադրում է ԱՄՆ մեկնելու համար այն դեպքում, երբ մեր իշխանությունը այդ 350 հազար դոլարը վճարում էր սիրիահայերի ներգաղթի համար:
Նիկոլ Փաշինյանը, ըստ մամուլի հրապարակումների՝ 1 մլն է ծախսում իր տան վերանորոգման համար, 3 մլն վարչապետից թաքուն իր նախարարների աշխատավարձերն է բարձրացնում և գլուխ է գովում, որ թոշակառուների թոշակները 3-4 հազար դրամով ավելացրել է:
– Դատելով ԱԺ-ում Նիկոլ Փաշինյանի ելույթից՝ այս հանրաքվեի հիմքում ևս դրված է նախկիններին մերժելու գաղափարը: Այս անգամ կաշխատի՞ այդ տեխնոլոգիան:
– Նախկինը, ներկան և ապագան արհեստական բաժանումներ են: Իսկ ո՞վ է նախկինը:
– Դուք:
– Մե՞նք: Ո՞վ է ասել: Մենք ապագան ենք: Նախկինը Նիկոլ Փաշինյանն է, որը մեր իշխանության օրոք եղել է ԱԺ ընդդիմադիր խմբակցության ղեկավար, եղել է ԱԺ ղեկավար կազմի խորհրդի անդամ, նախկինը նրա կառավարության կեսն են:
Եթե նախկինը այդքան վատն է, և նկատի ունի մեզ, մի հատ կառավարության նիստը նայեք՝ մեզնից թռածներին իր մոտ վերցրել է նախարար:
Էդ ո՞նց եղավ, որ ով մեզ, մեր սկզբունքներին դավաճանել է՝ նախկին չէ, իսկ ով իր սկզբունքներին է մնացել և դըմփ-դըմփ-հու-ին չի ծափահարել՝ նախկին է:
Ինձ համար նախկինի ու ներկայի մեկ բաժանում կա՝ Քրիստոսից առաջ և Քրիստոսից հետո: Կարող ես լինել 70 տարեկան, բայց լինել կենսունակ և մրցունակ, կարող ես լինել 1.5 տարվա վարչապետ, բայց լինել քաղաքական զրո:
Առավել մանրամասն՝ 168TV-ի տեսանյութում
