«Խաղաղության» անվան տակ փորձում են ՀՀ մի շարք բնակավայրեր հանձնել․ Տիգրան Աբրահամյան

«Խաղաղության» անվան տակ փորձում են ՀՀ մի շարք բնակավայրեր հանձնել․ Տիգրան Աբրահամյան

Հիմա էլ փորձում են «խաղաղության» անվան տակ ՀՀ մի շարք բնակավայրերի խաղաղ հանձնումն իրականացնել: Այս մասին ֆեյսբուքյան իր էջում գրել է ԱԺ «Պատիվ ունեմ» խմբակցության պատգամավոր Տիգրան Աբրահամյանը:

«Հայաստանի իշխանությունն իր տարբեր բնակավայրեր առևտրի առարկա է դարձրել, հայտնի 8 գյուղերը՝ վկա:

Ուշագրավ է այն հանգամանքը, որ այս ամենը տեղի է ունենում Ադրբեջանի առավելապաշտական դիրքորոշումների համատեքստում:

Ադրբեջանը խոսում է Հայաստանից ակնկալվող տարածքային զիջումների մասին և կտրականապես մերժում նույնիսկ 2021-22 թթ․ ընթացքում ՀՀ-ից օկուպացված տարածքներից իր զորքերը դուրս բերելու հարցը:

Դեռ չեմ խոսում այն տարածքների մասին, որոնք նրա վերահսկողության տակ են անցել 90-ականների սկզբին:

Թե ինչի է «ծովը չտեսած` բոբիկացել» իշխանությունը, կարելի է հասկանալ նրա` 2018-2023 թվականների քաղաքական վարքագծից, որի պայմաններում Արցախը հանձնեցին, ՀՀ ինքնիշխան տարածքներն անցան Ադրբեջանի վերահսկողության տակ, հազարավոր մարդիկ զոհվեցին, իսկ հիմա էլ փորձում են «խաղաղության» անվան տակ ՀՀ մի շարք բնակավայրերի խաղաղ հանձնումն իրականացնել»,- գրել է պատգամավորը։