Ժամանակավորապես կդադարեցվի Հայաստան բնական գազի մատակարարումը
Ժամանակավորապես` հուլիսի 24-ին ժամը 07:00-ից մինչև հուլիսի 26-ը ժամը 19:00-ը, կդադարեցվի Հայաստան բնական գազի մատակարարումը, հայտնում են «Գազպրոմ Արմենիայից»։
Նշվում է, որ պատճառը Վրաստանի տարածքում կատարվող վթարավերականգնողական աշխատանքներն են։
«Հյուսիսային Կովկաս-Անդրկովկաս» տարանցիկ մայրուղային գազատարի «Ղազախ-Սագուրամո» հատվածում վթարավերականգնողական աշխատանքներ իրականացնելու անհրաժեշտությամբ պայմանավորված հուլիսի 24-ին ժամը 07:00-ից մինչև հուլիսի 26-ը ժամը 19:00-ն կդադարեցվի Հայաստան բնական գազի մատակարարումը»,–ասված է հայտարարության մեջ:
Տեղեկացվում է նաև, որ նշված ժամանակահատվածում հանրապետության սպառողների անխափան և հուսալի գազամատակարարումը կիրականացվի առանց սահմանափակումների՝ ներքին պաշարների և ԻԻՀ-ից մատակարարվող բնական գազի լրացուցիչ ծավալների հաշվին:
