Զորականի անչափահասների ծեծկռտուքի տեսանյութը նկարահանել է մասնակիցներից մեկը. բռնության ենթարկված տղայի 18-ամյակն է եղել
Զորականի անչափահասների ծեծկռտուքը, որի տեսանյութը տարածվել է նախօրեին, տեղի է ունեցել մոտ երկու ամիս առաջ՝ աշնան սկզբներին։ Այդ մասին «Փաստինֆո»-ի հետ զրույցում ասել է Զորականի համայնքապետ Սուրեն Մարտիրոսյանը՝ նշելով, որ դեպքի առթիվ կա նախաձեռնված քրեական վարույթ, «կալանքի տակ էլ անձ է հայտնվել»։
Համայնքի ղեկավարը տարակուսած է, թե ինչու է տեսանյութը հիմա հայտնվել համացանցում, անհասկանալի է, բայց փաստ, որ այն նկարահանել են հենց «ռազբոռկայի» մասնակիցները։
«Դեպքը տեղի է ունեցել Նոյեմբերյանում։ Քոլեջի սովորողներ են, Ալենն էլ է հիմա էդ քոլեջում սովորում։ Պարզվում է՝ Ալենի խոսքերն են փոխանցել մյուսներին ու «ռազբորկա» է եղել։ Հետո ենք իմացել: Վատ ենք զգացել, բոլորի ծնողների համար էլ շատ տհաճ վիճակ է։ էշություն են արել։ Էդ բոլոր երեխաներն էլ անպատիժ չեն մնա, կպատժվեն՝ թե բարոյապես, թե օրենքի առաջ։
Ափսոս, էս ճանապարհով պիտի հասկանային, որ սխալ ճանապարհ են ընտրել իրար հետ հարցեր լուծելու»,- ասում է Սուրեն Մարտիրոսյանը։ Գյուղապետը նշեց, որ Ալենը աշխատող, համեստ ընտանիքում է մեծացել։ 13 տարի իրենց գյուղում են ապրել։
Մայրը տարբեր գործերով է գումար վաստակել, հայրը պայմանագրային զինվորական է եղել, հիմա շինարարություն է անում։ Տղան ընտանիքի մեծն է, ունի իրենից փոքր երկու քույր։ Ընտանիքում ամուսինները հաշտ չեն ապրել։ Համայնքապետի խոսքով՝ ժամանակին ոստիկանությունն էլ է խառնվել ներընտանեկան վեճերին։ Ծնողներն իրարից առանձին են ապրում, մայրն աղջիկների հետ Բերքավանում է, տղան էլ տատի հետ էր ապրում։
«Դե հիմա, եթե լինեին գյուղում, մեր աչքի առաջ, էդ խնդիրը չէր առաջանա։ Տղայական անհամաձայնությում էր, կանցներ կգնար։ Ես չեմ արդարացնում՝ պիտի հասկանան խոսքի արժեքը, հայհոյելը վատ բան է, ծեծը՝ ավելի վատ։ Ծնողներն էլ պիտի տեղյակ լինեին, ուսումնական հաստատություններն էլ։ Ալենը մի օր մոր մոտ է, մի օր՝ տատի, մի օր Իջևան՝ հոր հետ է»։
Զորականի համայնքապետն ասում է՝ վատ երեխաներ չեն, պետք է եղել օգնել են, չեն հրաժարվել համայնքային աշխատանքներից։
«Էս էրեխեքը իրար հետ 44- օրյա պատերազմի ժամանակ օգնել են մեզ, արցախցիների տեղահանության ժամանակ էլ ինձ օգնել են՝ տներ ենք մաքրել, առանձնացրել, արցախցիներին 33 ընտանիք ենք ընդունել ու տեղավորել»։
Համայնքապետը ասում է՝ բոլորն էլ մեղավոր են, կապ չունի, թե ում տղաներն են, օրենքի առաջ բոլորն են հավասար։
Ի դեպ, այսօր Ալենի ծննդյան օրն է, 18 տարին է լրանում։ Մեր զրույցի ժամանակ համայնքապետարանում էր, զինվորական հաշվառման համար փաստաթղթերն էր հավաքում։ Քոլեջն ավարտելուց հետո բանակ է գնալու, զինծառայությունը սարերի ետևում չէ։
Տեսանյութը սոցցանցում հրապարակել է օգտատեր Նանար Պողոսյանը, նկարահանողը տղաներից մեկն է։Դեպքը տեղի էր ունեցել սեպտեմբերին, բայց հանրային հնչեղություն է ստացել հրապարակումից հետո։ Քննչական կոմիտեն հայտնել էր, որ նախ ծեծկռտուքի մասնակից 5 տղաների նկատմամբ կալանքի միջնորդություն է եղել։
Դատարանը 4-ի նկատմամբ բավարարվել է 20-օրյա կալանքի միջնորդությունը, իսկ մեկի նկատմամբ սահմանվել է տնային կալանք: Երբ եկել է կալանքը երկարաձգելու ժամանակը, դատարանը մերժել է 4-ի նկատմամբ երկարաձգման միջնորդությունը, իսկ մեկի նկատմամբ կիրառվել է վարչական հսկողություն և բացակայելու արգելք: Գլխավոր դատախազությունը վերաքննիչ բողոք կներկայացնի կալանքը փոխելու որոշման դեմ՝ այս մասին «Փաստինֆո»-ին հայտնել են ՀՀ գլխավոր դատախազությունից։
Նշենք, որ երեկ համացանցում լայն տարածում էր ստացել մի տեսանյութ, որտեղ մի քանի հոգի հարձակվել ու ծեծում էին մեկին՝ Ալենին։
