Երազելուց վնաս չկա․ Զախարովա
Երազելուց վնաս չկա․ Զախարովա
Ռուսաստանի ԱԳՆ պաշտոնական ներկայացուցիչ Մարիա Զախարովան, մեկնաբանելով Բալթիկ ծովի վերաբերյալ Լեհաստանի նախագահ Անջեյ Դուդայի խոսքերը, հայտարարել է, որ «երազելուց վնաս չկա»։Ավելի վաղ Լեհաստանի նախագահ Անջեյ Դուդան հայտարարել էր, որ Ֆինլանդիայի և Շվեդիայի ՆԱՏՕ-ին անդամակցելով Բալթիկ ծովը դառնում է դաշինքի ներքին ավազանը:
«Ինչպես ասում էին դասականները, երազելուց վնաս չկա»,- ասել է Զախարովան ճեպազրույցի ժամանակ:
Նա պարզաբանել է, որ Բալթիկ ծովը շրջապատված է ոչ միայն ՆԱՏՕ-ի անդամ երկրների, այլև Ռուսաստանի տարածքներով։
«Ըստ սահմանման` դաշինքի համար այն ներքին համարվել չի կարող։ Ֆինլանդիայի և Շվեդիայի միացումը Հյուսիսատլանտյան դաշինքին այդ փաստի վրա որևէ կերպ չի ազդում, որքան էլ դա ցանկանան Լեհաստանում կամ որևէ այլ տեղ»,-նշել է ՌԴ ԱԳՆ պաշտոնական ներկայացուցիչը։
Խոսելով ՆԱՏՕ-ին Հելսինկիի և Ստոկհոլմի անդամակցության մասին՝ Զախարովան նշել է, որ այդ իրադարձությանը Մոսկվայի արձագանքը կախված կլինի Ռուսաստանի անվտանգության համար դրանից առաջացող սպառնալիքների բնույթից և աստիճանից:
«Անհրաժեշտության դեպքում կընդունվեն բոլոր հավասարակշռող ռազմատեխնիկական միջոցառումները, այդ թվում՝ այսպես կոչված «ներքին ծովի» ջրատարածքում»,- ասել է ՌԴ արտաքին քաղաքական գերատեսչության ներկայացուցիչը:
