Դիլիջանում 41-ամյա տղամարդը շների ականջները կտրել է՝ պատճառաբանելով, թե «ինձ պատկանող միսը կերել են»
Դիլիջանում 41-ամյա տղամարդը շների ականջները կտրել է՝ պատճառաբանելով, թե «ինձ պատկանող միսը կերել են»
Երեկ՝ հունվարի 3-ին, ՀՀ Ներքին գործերի նախարարության ոստիկանության Տավուշի մարզային վարչությունում և ոստիկանության Դիլիջանի բաժնում օպերատիվ տեղեկություններ են ստացվել, որ Դիլիջանում «մի ծալապակաս» շների նկատմամբ անմարդկային վերաբերմունք է ցուցաբերել, -այս մասին հաղորդում է Shamshyan.com-ը։
Տեղում Տավուշի մարզի ոստիկանության պետ Արթուր Մկրտչյանի, վարչության պետի օպերատիվ գծով տեղակալ Սևակ Բադիրյանի և ոստիկանության Դիլիջանի բաժնի պետ Վլադ Բազունցի գլխավորությամբ ստեղծվում են օպերատիվ խմբեր և սկսվում է «ծալապակասին» հայտնաբերելու գործողությունների գործընթաց։
Ինչպես հայտնում է ֆոտոլրագրող Գագիկ Շամշյանը, ոստիկանության Տավուշի մարզային վարչության քրեական հետախուզության բաժնի, ոստիկանության Դիլիջանի բաժնի քրեական հետախուզության և համայնքային ոստիկանության բաժանմունքների ծառայողները հսկայածավալ աշխատանքի արդյունքում պարզել են, որ ստացված օպերատիվ տեղեկությունը հավաստի է և նշված արարքը կատարելու կասկածանքով ոստիկանության Դիլիջանի բաժին են հրավիրել Տավուշի մարզի բնակիչ 41-ամյա Մ․Մ․-ին։
Վերջինս, փաստերի ճնշման տակ, խոստովանել է, որ դեկտեմբերի 31-ին Դիլիջանում՝ Մյասնիկյան փողոցում՝ մշակույթի տան հարակից տարածքում ինքն է դանակով կտրել 2 շան ականջներ։Նա հայտնել է, որ այդ քայլին է դիմել, քանի որ շները իրեն պատկանող տավարի մսից մի մաս կերել են, իսկ մի մասն էլ՝ հոշոտել։ Պարզվել է, որ հանցագործության գործիք դանակն էլ նա պահել է տանը։
Նշված արաքը կատարելու համար Մ․ Մ․-ն ոստիկանների կողմից ձերբակալվել և ներկայացվել է Հայաստանի Քննչական կոմիտեի Տավուշի մարզային քննչական վարչության Դիլիջանի քննչական բաժին, որտեղ դեպքի փաստով նախաձեռնվել է քրեական վարույթ։
Գ․ Շամշյանի տեղեկություններով շներին տեղաբնակները կանչում էին «Չալո» և «Զազո», իսկ օտարերկրացիները, մասնավորապես ռուսենրը շներին կանչում էին «Լապայի» և «Տելյոնկի»։
