Գյումրու ընդդիմադիր ավագանին քաղաքապետ կընտրի Վարդան Ղուկասյանին․ որոշում

ArmLur.am-ը տեղեկացավ՝ քիչ հետո Գյումրու համայնքապետի թեկնածու «Մեր քաղաքը» դաշինքի առաջնորդ Մարտուն Գրիգորյանը հանդես կգա հայտարարությամբ։

ArmLur.am-ը տեղեկացավ նաև, որ նա պատրաստվում է ընդամենը 2 ձայն տալ Վարդան Ղուկասյանին միայն նրա համար, որ Գյումրին, ինչպես նա էր խոստացել, չունենա ՔՊ-ական համայնքապետ։

Մարտուն Գրիգորյանը իր հայտարարությունում կնշի նաև, որ իրենք որևէ պատասխանատվություն չեն կրելու Գյումրու կառավարման հետագա հարցերում։

Երեկ ողջ հանրապետությունը սպասում է Գյումրու արտահերթ ՏԻՄ ընտրություններում երրորդ տեղը գրաված Մարտուն Գրիգորյանի հայտարարությանը։

Հիշեցնենք, որ երեկ առավոտյան քաղաքական 2 ուժ՝ «Իմ հզոր համայնք» կուսակցության ղեկավար Ռուբեն Մխիթարյանը և «Մայր Հայաստան» դաշինքի առաջնորդ Անդրանիկ Թևանյանը հայտնեցին, որ իրենց ձայնը կտան Վարդան Ղուկասյանին։

Ընդդիմությունը սպասում էր Մարտուն Գրիգորյանի վճռորոշ ձայնին։ Եթե Մարտուն Գրիգորյանը չհամաձայներ ձայն տալ Ղուկասյանին, ապա Գյումրին պետք է ևս մեկ անգամ ընտրի։