«Ավտոբուսը չինական ա, կառոբկեն ու մատոռը իրար չեն հասկանում․ վարորդները դժգոհ են Ավինյանի բերած ավտոբուսներից
«Ավտոբուսը չինական ա, կառոբկեն ու մատոռը իրար չեն հասկանում․ վարորդները դժգոհ են Ավինյանի բերած ավտոբուսներից
Օրերս Երևանի ավտոբուսներից մեկում հերթական միջադեպն է եղել, երբ վարորդը կտրուկ արգելակել է, ժողովուրդն էլ իրար վրա են ընկել։ Ուղևորներից մեկը Oragir.News-ի հետ զրույցում միջադեպի վերաբերյալ մանրամասներ հայտնեց, ապա ուշագրավ տեղեկություն փոխանցեց։
«Ուղևորության ընթացքում պարբերաբար ավտոբուսը թափ էր տալիս, կանգնած մարդիկ գլորվում, իրար էին բախվում։ Ուղևորներից մի քանիսը սկսեցին բարձրաձայն բողոքել։ Հետո, որ մի հատ էլ ավտոբուսը թափ տվեց, վարորդը, որը շատ կիրթ, երիտասարդ տղա էր, բարձրաձայն գոռաց․ «Ժողովո՛րդ, ես մեղք չունեմ, ավտոբուսը չինական ա, կառոբկեն ու մատոռը իրար չեն հասկանում, դրա համար էլ թափ ա տալիս»։
Խոսքը չինական «Ժոնգ Թոնգ» մակնիշի կապույտ ավտոբուսների մասին է, որոնց նոր խմբաքանակը մի քանի ամսից երթուղի դուրս կգա, բայց այս անգամ կանաչ գույնով։
«Երևան ավտոբուս» ՓԲԸ-ի վարորդներից մեկը Oragir.News-ի հետ զրույցում հաստատեց այս տեղեկությունը․
«Տասնյակ ավտոբուսներ նույն խնդրով հենց հիմա պարկում կանգնած են, չեն շահագործվում, մինչև վերանորոգեն։ Ինչքան ուզում են լավ սարքեն, միևնույն է դրանք գործարանային դեֆեկտ ունեն, ու դա հնարավոր չէ այնպես վերանորոգել, որ խնդիրը լուծվի։
Զարմանալի է, որ քաղաքապետարանում, այս խնդիրը իմանալով, նորից նույն ավտոբուսներից պատվիրեցին։ Խնդիրը նրանում է, որ մենք ենք ուղևորների հետ լավ ու վատ լինում, մի հատ թեթև արգելակում ես, ավտոբուսում «երկրաշարժ» է լինում»։
Oragir.News-ը թեմայի վերաբերյալ փորձեց պարզաբանում ստանալ «Երևան ավտոբուս» ՓԲԸ-ից, սակայն, մեզ խնդրեցին գրավոր հարցում ուղարկել։
