Ազատամուտ գյուղում՝ Աղստև գետից դուրս է բերվել ջրահեղձ եղած քաղաքացու մարմինը. մյուսին որոնում են
Shamshyan.com-ը գրում է․ Այսօր՝ օգոստոսի 5-ին, ժամը 15:10-ի սահմաններում ՀՀ ներքին գործերի նախարարության ոստիկանության Տավուշի մարզային վարչությունում և ոստիկանության Իջևանի բաժնում օպերատիվ տեղեկություններ են ստացվել, որ Ազատամուտ բնակավայրին հարակից Պլատինի մոտ գտնվող ջրանցքում քաղաքացիներ են ջրահեղձ եղել:
Ինչպես հայտնում է ֆոտոլրագրող Գագիկ Շամշյանը, դեպքի վայր են ժամանել ոստիկանության Տավուշի մարզային վարչության պետ Արթուր Մկրտչյանը, վարչության պետի օպերատիվ գծով տեղակալ Սևակ Բադիրյանը և ոստիկանության Իջևանի բաժնի պետի ժամանակավոր պաշտոնակատար Խաչատրյանը:
Ժամանել է նաև Տավուշի մարզի դատախազի պարտականությունների ժամանակավոր պաշտոնակատար Սարգսյանը:
Ահազանգով ժամանել են ՀՀ ՆԳՆ փրկարար ծառայության Տավուշի մարզային փրկարարական վարչության և Իջևանի հրշեջ-փրկարարական ջոկատից՝ վարչության պետ Փիրումյանի գլխավորությամբ:
Օպերատիվորեն ժամանել են նաև ՀՀ ՆԳՆ ոստիկանության Պարեկային ծառայության Տավուշի մարզի գումարտակի պարեկները՝ գումարտակի հրամանատար Արմեն Բեժանյանի գլխավորությամբ:
Պարզվել է, որ Տավուշի մարզի բնակիչներ 33-ամյա Հայկ Է.-ն և 34-ամյա Աբգար Բ.-ն Կրիվոյ կոչվող տարածքում՝ Աղստև գետի վրա կառուցված «Պլատինում»-ում ձուկ բռնելու և լողալու ժամանակ ջրահեղձ են եղել:
Գ. Շամշյանի տեղեկություններով՝ դեպքի վայր ժամանած Սևանի ջրասուզակները ջրահեղձ եղած քաղաքացիներից մեկին հայտնաբերել են, մյուսին՝ որոնում են:
Դեպքի մասին ոստիկանության Իջևանի բաժնից տեղեկությունը փոխանցել են ՀՀ քննչական կոմիտեի Տավուշի մարզային քննչական վարչություն, որտեղից ժամանել է քննչական խումբը՝ վարչության պետի և օրվա պատասխանատու հերթապահ քննիչի գլխավորությամբ:
Դեպքի փաստով Տավուշի մարզային քննչական վարչությունում «դժբախտ պատահար» հատկանիշներով նախաձեռնվել է քրեական վարույթ:
