Ադրբեջան անցած զինծառայողի մորը տեղափոխել են հիվանդանոց, հայրը մեկնել է Արցախ
Ադրբեջան անցած զինծառայողի մորը տեղափոխել են հիվանդանոց։ Մարտական դիրքը լքած 19-ամյա զինծառայող Արայիկ Ղազարյանը Վայոց Ձորի մարզի Եղեգիս համայնքի բնակիչ է։ Նա ապրում է հոր, մոր եւ եղբոր հետ, անապահով ընտանիքից Է։ Այս մասին մեզ հետ զրույցում ասաց Եղեգիսի համայնքապետ Արթուր Ստեփանյանը։
Նրա խոսքով՝ Արայիկի մորը տեղափոխել են հիվանդանոց այն բանից հետո, երբ իմացել է որդու մասին լուրը, հայրն էլ երեկ մեկնել է Ղարաբաղ. «Շատ նորմալ, կազմակերպված երիտասարդ ա եղել, հետաքրքասեր էր ընդհանուր առօրյայի հետ կապված։ Մայրն էլ վատառողջ կին էր, երբ տեղեկացավ նման բան է կատարվել, տեղափոխել ենք Եղեգնաձորի հիվանդանոց։ Այցելել եմ ընտանիքին, հորը չեմ հանդիպել, մեկնել էր Ղարաբաղ, եղբոր հետ, պապիկի հետ եմ զրուցել»։
Ըստ համայնքապետի՝ գյուղում լուրեր են շրջանառվում, որ Արայիկը մառախուղի պատճառով է հայտնվել թշնամու սահմանում։ Ըստ նրա՝ 10 օր առաջ էր արձակուրդ եկել, երբեք չի դժգոհել ծառայությունից․ «Պրոբլեմներ չի եղել, գյուղում տարածված լուրեր չեն եղել, որ էրեխուն նեղություն են տվել»։
Այսօր ԱՀ ՊՆ մամուլի ծառայությունը դեպքի վերաբերյալ հաղորդագրություն է տարածել․ «Ադրբեջանական քարոզչամեքենան համացանցում տարածում է ս.թ. օգոստոսի 12-ին, դեռևս չպարզված հանգամանքներում, ադրբեջանական կողմում հայտնված ժամկետային զինծառայող, շարքային Արայիկ Ղազարյանի լուսանկարները: Նշվում է, որ զինծառայողը թողել է իր ծառայության վայրը ոչ կանոնադրական հարաբերությունների պատճառով, իսկ շարքային Ղազարյանի մարմնին առկա թեթև քերծվածքներն ու սպիները ներկայացվում են իբրև նրա հանդեպ գործադրված բռնության ապացույցներ:
Իրականությունը խեղաթյուրված ներկայացնելը և սեփական վայրագությունները դիմացի կողմին վերագրելը ադրբեջանական քարոզչամեքենայի վաղուց ծանոթ գործելաոճն է: ԱՀ ՊՆ մամուլի ծառայությունը հորդորում է հավատ չընծայել ադրբեջանական կողմի ստահոդ պնդումներին, որոնք նպատակաուղղված են միմիայն հայ զինվորի կերպարը նսեմացնելուն և սպասել ընթացող քննության ավարտին, որի արդյունքները հասանելի են լինելու հանրությանը»։
Աղբյուր՝ hraparak.am
