Հանրային հեռուստաընկերության աշխատակիցներն Արագած լեռ բարձրանալիս խնդիրներ են ունեցել. օգնության են հասել Արթիկի փրկարարները

Հանրային հեռուստաընկերության աշխատակիցներն Արագած լեռ բարձրանալիս խնդիրներ են ունեցել. օգնության են հասել Արթիկի փրկարարները

Shamshyan.com-ի փոխանցմամբ՝ այսօր՝ հուլիսի 21-ին, արտակարգ դեպք է տեղի ունեցել Արագածոտնի մարզում:

Ժամը 06:20-ի սահմաններում Արտակարգ իրավիճակների նախարարության փրկարար ծառայության 911 օպերատիվ կառավարման կենտրոն ահազանգ է ստացվել, որ արշավախմբով՝ 3 ավտոմեքենայով, քաղաքացիները բաձրացել են Արագած լեռ (մոտ 3300 մ հատվածում), խմբի անդամներից մեկի ինքնազգացողությունը վատացել է և անհրաժեշտ է փրկարարների ու բժիշկների օգնությունը:

Ինչպես հայտնում է ֆոտոլրագրող Գագիկ Շամշյանը, ահազանգը փոխանցվել է Արագածոտնի և Շիրակի մարզային փրկարարական վարչություններ, որտեղից հրշեջ-փրկարարների խումբը ուղևորվել է նշված վայր:

Օպերատիվորեն քաղաքացիներին օգնության են հասել նաև ոստիկանության Արթիկի բաժնի հերթապահ խումբը՝ համայնքային ոստիկանության բաժանմունքի տեսուչ Տարոն Սարգսյանի գլխավորությամբ:

Նրանց են միացել նաև բժիշկների հերթապահ խմբերը: Փրկարարները և ոստիկանները մոտ 3 կմ ավտոմեքենաներով կարողացել են մոտենալ Արագած լեռան ստորոտին, որից հետո մոտ 3,5 կմ ոտքով հասել են արշավախմբի անդամներին:

Պարզվել է՝ ռադիոտեխնիկական չափումների մեկնած խումբը, որում եղել է 8 քաղաքացի, չի կարողացել դժարանցանելի որոշ հատվածով շարժվել, քանի որ խմբի անդամներից 48-ամյա Գևորգ Մարտիրոսյանի ինքնազգացողությունը շոգի պատճառով վատացել է:

Այսօր՝ ժամը 11:30-ին, փրկարարներն ու ոստիկանները Հառիճ գյուղի վարչական տարածքում՝ նախկին զորամասի մոտակայքում, հանդիպել են արշավախմբին, որտեղից էլ Արթիկի ոստիկանների հետ նրանց ուղեկցել են ԱԻՆ ՓԾ Արթիկի թիվ 49 հրշեջ-փրկարարական ջոկատ:

Աղբյուրի տեղեկություններով՝ արշավախմբի անդամներն են՝ 30-ամյա Տիգրան Խաչատրյանը, 31-ամյա Հրանտ Մանասյանը, 51-ամյա Վահագն Պողոսյանը, 42-ամյա Երվանդ Պողոսյանը, 68-ամյա Գարեգին Խումարյանը, նրա 8-ամյա դուստրը, 58-ամյա Տիգրան Խանամիրյանն ու 48-ամյա Գևորգ Մարտիրոսյանը:

Բոլորի առողջական վիճակը կայուն է, առողջական ոչ մի խնդիր չունեն:

Աղբյուրի տեղեկություններով՝ նշված անձինք աշխատում են Հանրային հեռուստաընկերությունում: