Ծեծկռտուք Երևանում. ԱԺ պատգամավորի որդուն բերման են ենթարկել

Երևանյան ռեստորաններից մեկում տեղի ունեցած վիճաբանություն-ծեծկռտուքի «գլխավոր դերերում» եղել են պատգամավորի տղան ու մատուցողը։

Երևանում գործող «Գարեջրի ակադեմիա» ռեստորանային համալիրում Ազգային ժողովի ՀՀԿ-ական պատգամավոր, «Հոկտեմբերյանցի Նովո» մականվամբ Նահապետ Գևորգյանի տղան ու ռեստորանի մատուցողներից մեկը վիճաբանել են։ Դեպքը տեղի է ունեցել մայիսի 27-ին։

Ոստիկանության 6-րդ գլխավոր վարչության աշխատակիցները վիճաբանությանը մասնակցելու կասկածանքով ոստիկանության Կենտրոնական բաժին են բերման ենթարկել Արմավիր քաղաքի բնակիչ՝ 36-ամյա Արտակ Գևորգյանին։

Պարզվել է, որ նա նշված ռեստորանային համալիրում վիճաբանել է մատուցողի՝ 27-ամյա Տ. Մ.-ի հետ, վեճը վերածվել է ծեծկռտուքի։

Ըստ կայքի` մատուցողը պատասխանել է նրա` ափսեով հարվածելով գինովցած Գևորգյանի գլխին, որից հետո վերջինս էլ հարվածել է մատուցողին։ Կայքում նշված է, որ Ազգային ժողովի պատգամավորի որդին նախկինում դատապարտված է եղել։

Աղբյուր՝ socialmedia.am

Կիսվիր ընկերներիդ հետ