Խոշոր ավտովթար Կոտայքի մարզում․ կա 5 վիրավոր

Խոշոր ավտովթար Կոտայքի մարզում․ կա 5 վիրավոր

Shamshyan.com-ը գրում է․ Այսօր՝ հունվարի 10-ին, խոշոր ավտովթար է տեղի ունեցել Կոտայքի մարզում։ Ժամը 18։30-ի սահմաններում Երևան-Աշտարակ ավտոճանապարհի՝ Պռոշյան գյուղի վարչական տարածքում՝ ՀՀ նախկին պաշտպանության նախարարության վարչական շենքի հարևանությամբ բախվել են Mercedes, Opel Vectra, GAZ 2410 և VAZ 2121 մակնիշի ավտոմեքենաները։

Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով 5 հոգի տարբեր աստիճանի մարմնական վնասվածքներով տեղափոխվել են՝ երկուսը՝ «Աշտարակ», երեքը՝ Երևանի «Արմենիա» բժշկական կենտրոններ։

Օպերատիվորենդեպքի վայր են ժամանել Արտակարգ իրավիճակների նախարարության փրկարար ծառայության Երևանի թիվ 7 հրշեջ փրկարարական ջոկատից 1 մարտական հաշվարկ։ 

Բախման հետևանքով Նիվան կողաշրջվել է։ Իսկ Mercedes-ը և Opel-ը դուրս են եկել երթևեկելի գոտուց, ԳԱԶ 2410-ն էլ հայտնվել է ճանապարհի մեջտեղում, ինչի պատճառով երթևեկությունը դարձել էր դժվարանցանելի։

Օպերատիվորեն ժամանել են Ճանապարհային ոստիկանության 2-րդ սպայական գումարտակի 3-րդ վաշտի 1-ին դասակի ծառայողները՝ վաշտի հրամանատար Արթուր Պետրոսյանի, նույն վաշտի 2-րդ դասակի հրամանատար Սարգիս Բագրատյանի գլխավորությամբ։ 

Օպերատիվորեն ժամանել են նաև ոստիկանության Նաիրիի բաժնի օպերատիվ խումբը՝ բաժնի պետ Ռուբեն Ներսիսյանի գլխավորությամբ։

Տեղում ուժեղացված ծառայություն են կատարել նույն վաշտի ավագ տեսուչները։ 

Վթարի մասին ՃՈ 177 օպերատիվ կառավարման կենտրոնի պատասխանատու հերթապահ Դավիթ Գրիգորյանը տեղեկությունը փոխանցել է Հայաստանի քննչական կոմիտեի Կոտայքի մարզային քննչական վարչության Նաիրիի քննչական բաժին, որտեղից ժամանել է քննչական խումբը՝ բաժնի պետ Հակոբ Հակոբյանի և հատկապես կարևոր գործերով ավագ քննիչի գլխավորությամբ։ 

Վթարի փաստով Նաիրիի քննչական բաժնում նախաձեռնվել է վարույթ։ 
Ոստիկանությունն ու քննչական բաժինը պարզում են վարորդների և վիրավորների ինքնությունը։