«Աշխատանքային և անձնական ձեռքբերումների տարի էր 2018-ը»․ Ադրիանա Գալստյանի նոր, տոնական ֆոտոշարքը

Անցնող տարին Ադրիանա Գալստյանի համար գործնական առումով բավական հագեցած էր: Նա նկարահանվեց «Հեքիաթահարված» արկածային, այնուհետև «Ժամանակն է» գեղարվեստական ֆիլմերում, երաժշտական տեսահոլովակներում: Այսօր էլ շարունակում է խաղալ «Նռան հատիկ» սերիալում: 

-Աշխատանքային և անձնական ձեռքբերումների տարի էր 2018-ը: Անձնական ասելով՝ նկատի ունեմ նոր ընկերներիս, ովքեր կարճ ժամանակահատվածում ինձ շատ հարազատ դարձան:

Մինչ տարեվերջ հեռուստադիտողին հասանելի կլինի եւս մեկ տեսահոլովակ, որտեղ գլխավոր հերոսուհուն եմ մարմնավորում: Այս անգամ համագործակցել եմ երգիչ, դերասան Կարեն Ասլանյանի հետ, ում ճանաչում եմ դեռ վաղուց: Շատ լավ ընկերներ ենք եւ որոշեցինք միասին աշխատել: Ստացանք ուրախ, դրական հոլովակ: 

Իսկ գալիք տարվա ծրագրերի մասին դեռ վաղ է խոսել:

Տոներին ընդառաջ

Արդեն իսկ սկսել եմ ընկերներիս եւ հարազատներիս համար նվերներ գնել, եղեւնին զարդարել եմ, նաեւ տոնական ուտեստների բաղադրատոմսերի ցանկն եմ փորձում կազմել: Ամանորն այս տարի դիմավորելու եմ տանը՝ Հրազդան քաղաքում: Իսկ կճամփորդեմ մի փոքր ուշ:

Նոր տարվա խորհուրդը

Հավատում եմ Ամանորի հրաշքին, եւ ոչ միայն: Առհասարակ, սիրում եմ միշտ լավ տրամադրվել եւ դրականը տեսնել: Այդպես ամեն ինչ սպասվածից ավելի լավ է ստացվում: Անկեղծ ասած՝ դեռ չեմ կարող առանձնացնել իմ կյանքի ամենից հիշարժան ու տպավորիչ Ամանորը: Կարծում եմ՝ այս տարին լինելու է ամենասպասվածը:

Տարիների հետ ինձ համար փոխվում է նաեւ Ամանորի խորհուրդը: Ավելի վաղ տարիներին այն ասոցացնում էի հեքիաթային աշխարհի հետ, պատկերացումներս ավելի ուրիշ էին: Հիմա ինձ համար իմաստն ընտանեկան անմոռանալի, ջերմ մթնոլորտն է, երբ անկախ ամեն ինչից, կեսգիշերին ամբողջ ընտանիքը միասին է` ժպիտով եւ երջանիկ:

Ավանդական դարձած ֆոտոշարքի մասին

Ինչպես նախորդ, այս տարի եւս Ամանորի թեմատիկայով լուսանկարահանման մասնակցեցի: Առհասարակ, ֆոտոշարքերի սիրահար եմ: Անգամ սիրում եմ որպես լուսանկարիչ հանդես գալ: Սոցցանցերի իմ հետեւորդները հաճախ կարող են տեսնել իմ հեղինակած կադրերը:

Լուսանկարները փոխանցում են տոնական տրամադրությունը, հեքիաթային մթնոլորտն ու հրաշքի սպասումը: Այս տարի էլ երազանք եմ մտապահելու: Վստահ եմ, որ շատ ցանկանալու դեպքում դրանք իրագործվում են:

Աղբյուր՝ bravo.am