Մամուլ

Դատարանը ցմահ ազատազրկման դատապարտված Կարեն Օգանեսյանին պայմանական ազատեց պատժից

Երևան քաղաքի ընդհանուր իրավասության դատարանը, նախագահությամբ դատավոր Արթուր Մկրտչյանի, քիչ առաջ որոշեց ցմահ ազատազրկման դատապարտված Կարեն Օգանեսյանին պայմանական վաղաժամ ազատել պատժից:

Սա հազվադեպ երևույթ է. թեև Հայաստանում ցմահ ազատազրկման դատապարտված անձանց պայմանական վաղաժամկետ ազատ արձակման իրավակարգավորումը առկա է, տարիներ շարունակ ցմահներն ազատ չեն արձակվել:

Նուբարաշեն քրեակատարողական հիմնարկը, որտեղ պատիժ է կրում Օգանեսյանը, վերջերս դատապարտյալի պայմանական վաղաժամկետ ազատման վերաբերյալ դրական եզրակացություն է տվել, և օրենքով սահմանված կարգով նրան ազատ արձակելու վերաբերյալ միջնորդություն է ներկայացվել դատարան, որն այսօր քննվում էր:

«Դատապարտյալ Կարեն Վալերիի Օգանեսյանը պատժի կրման ընթացքում դրսևորել է դրական վարքագիծ և դատապարտյալի կողմից նոր հանցանք կատարելու հավանականությունը ցածր է, դատապարտյալը կանգնել է ուղղման ճանապարհին, ուստի վերջինիս պատիժը կրելուց պայմանական վաղաժամկետ ազատելու ներկայացնելը նպատակահարմար է»,- գրված է Նուբարաշեն քրեակատարողական հիմնարկի սոցիալ-հոգեբանական և իրավական աջակցության բաժնի գլխավոր մասնագետ Արմեն Պետրոսյանի կողմից ստորագրված եզրակացության մեջ:

Վերջինս այսօր դատարանում էր, Օգանեսյանի ազատ արձակման դեմ առարկություն չներկայացրեց: Առարկություն չներկայացրեց նաև նիստին ներկա դատախազ Աշոտ Խաչատրյանը:

Աղբյուր՝ hetq.am

Կիսվել նյութով